ប្រែសម្រួល៖ ស-សម្បត្តិ

ទីក្រុងតៃប៉ិ៖ កាលពីឆ្នាំ២០១៥ នៅពេលដែលក្រុមហ៊ុន Powerchip Technology របស់តៃវ៉ាន់បានចុះកិច្ចព្រមព្រៀងជាមួយទីក្រុងហ៊ីហ្វេ នៅភាគខាងកើតប្រទេសចិន ដើម្បីបង្កើតរោងចក្រផលិតឈីបថ្មីមួយ ក្រុមហ៊ុននេះសង្ឃឹមថា ជំហាននេះនឹងជួយផ្តល់លទ្ធភាពចូលទៅកាន់ទីផ្សារចិនដ៏គួរឱ្យទាក់ទាញកាន់តែប្រសើរ។

ប៉ុន្តែប្រាំបួនឆ្នាំក្រោយមក រោងចក្រចិនដែលមានឈ្មោះថា Nexchip នោះ បានក្លាយជាគូប្រជែងដ៏ធំមួយរបស់ខ្លួនក្នុងវិស័យឈីបបុរាណ ដោយបានប្រើប្រាស់ការបញ្ចុះតម្លៃយ៉ាងច្រើន បន្ទាប់ពីការអំពាវនាវឱ្យប្រើប្រាស់ផលិតផលក្នុងស្រុករបស់ប៉េកាំង បានបង្ខំឱ្យ Powerchip បោះបង់អាជីវកម្មដែលធ្លាប់តែរកប្រាក់ចំណេញបានច្រើនក្នុងការផលិតសៀគ្វីរួមសម្រាប់អេក្រង់បញ្ចាំងរូបភាពរបស់ចិន។

Nexchip គឺជាក្រុមហ៊ុនផលិតឈីបចិនមួយក្នុងចំណោមក្រុមហ៊ុនដែលកំពុងឈ្នះយកចំណែកទីផ្សារយ៉ាងឆាប់រហ័សក្នុងឧស្សាហកម្មសំខាន់ដែលមានតម្លៃ ៥៦,៣ ពាន់លានដុល្លារអាមេរិក នៃឈីបហៅថាឈីបបុរាណ ឬឈីបកម្រិតចាស់ ដែលផលិតដោយប្រើបច្ចេកវិទ្យា ២៨ ណាណូម៉ែត្រ និងធំជាងនេះ។ និន្នាការនេះបានជំរុញឱ្យរដ្ឋបាល Biden ចាប់ផ្តើមធ្វើការស៊ើបអង្កេត និងបានធ្វើឱ្យឧស្សាហកម្មតៃវ៉ាន់មានការព្រួយបារម្ភ។

ក្រុមហ៊ុនផលិតឈីបទាំងនេះរបស់ចិន ដែលរួមមាន Hua Hong និង SMIC កំពុងគំរាមកំហែងដល់ភាពជាអ្នកគ្រប់គ្រងទីផ្សារដ៏យូរអង្វែងរបស់ក្រុមហ៊ុន Powerchip, UMC និង Vanguard International ក្នុងទីផ្សារឈីបដែលប្រើប្រាស់ក្នុងរថយន្ត និងផ្ទាំងបង្ហាញរូបភាព ដោយការកាត់បន្ថយតម្លៃ និងការអនុវត្តផែនការពង្រីកសមត្ថភាពផលិតកម្មយ៉ាងសកម្ម។

ក្រុមហ៊ុនផលិតឈីបតៃវ៉ាន់ត្រូវបានបង្ខំឱ្យដកថយ ឬស្វែងរកដំណើរការកាន់តែទំនើប និងឯកទេសជាងមុន នេះបើយោងតាមការលើកឡើងរបស់ថ្នាក់ដឹកនាំនៅតៃវ៉ាន់។

“រោងចក្រផលិតឈីបកម្រិតចាស់ដូចយើង ត្រូវតែផ្លាស់ប្តូរ បើមិនដូច្នោះទេ ការកាត់បន្ថយតម្លៃរបស់ចិននឹងធ្វើឱ្យយើងកាន់តែលំបាកថែមទៀត” នេះជាសម្តីរបស់លោក Frank Huang ប្រធានក្រុមហ៊ុន Powerchip Investment Holding និងក្រុមហ៊ុនបុត្រសម្ព័ន្ធដែលបានចុះបញ្ជីរបស់ខ្លួនគឺ Powerchip Manufacturing Semiconductor Corporation ដែលក្រុមហ៊ុននេះត្រូវបានរៀបចំឡើងវិញក្នុងឆ្នាំ២០១៩។

ក្រុមហ៊ុន UMC បានប្រាប់សារព័ត៌មាន Reuters ថា ការពង្រីកសមត្ថភាពផលិតកម្មនៅទូទាំងពិភពលោកបានបង្កើត “បញ្ហាប្រឈមធ្ងន់ធ្ងរ” សម្រាប់ឧស្សាហកម្មនេះ ហើយក្រុមហ៊ុនកំពុងធ្វើការជាមួយ Intel ដើម្បីអភិវឌ្ឍឈីបកាន់តែទំនើប និងតូចជាងមុន ព្រមទាំងធ្វើពិពិធកម្មឱ្យហួសពីការផលិតឈីបបុរាណ។

ភាពតានតឹងផ្នែកពាណិជ្ជកម្មរវាងវ៉ាស៊ីនតោន និងប៉េកាំង អាចនឹងកាត់បន្ថយការឈឺចាប់បន្តិច នេះបើយោងតាមថ្នាក់ដឹកនាំនៅតៃវ៉ាន់ ដោយសារក្រុមហ៊ុននានាសង្ឃឹមថានឹងធានាបាននូវខ្សែសង្វាក់ផ្គត់ផ្គង់ និងស្វែងរកឈីបដែលផលិតនៅក្រៅប្រទេសចិន។

ទោះយ៉ាងណាក៏ដោយ ប្រធានាធិបតីសហរដ្ឋអាមេរិក Donald Trump បាននិយាយថា លោកមានគម្រោងដាក់ពន្ធគយខ្ពស់រហូតដល់ ១០០ ភាគរយ លើឧបករណ៍សេមីកុងដុចទ័រដែលផលិតនៅក្រៅសហរដ្ឋអាមេរិក។

ក្រុមហ៊ុន Vanguard International បដិសេធមិនធ្វើអត្ថាធិប្បាយ។ ក្រុមហ៊ុន SMIC, Nexchip និង Huahong មិនបានឆ្លើយតបនឹងសំណើសុំការអត្ថាធិប្បាយទេ។

• ថោកជាង និងកាន់តែមានភាពសកម្មជាងមុន

ដោយត្រូវបានសហរដ្ឋអាមេរិករារាំងមិនឱ្យទទួលបានបច្ចេកវិទ្យាឈីបកម្រិតខ្ពស់ក្នុងប៉ុន្មានឆ្នាំថ្មីៗនេះ រោងចក្រផលិតឈីបរបស់ចិនបានបង្កើនការផលិតឈីបបុរាណទ្វេដង និងបានកាត់បន្ថយតម្លៃទាបជាងដៃគូប្រកួតប្រជែងតៃវ៉ាន់ ដោយសារការគាំទ្រផ្នែកហិរញ្ញវត្ថុយ៉ាងខ្លាំងពីប៉េកាំង និងការទទួលយកអត្រាប្រាក់ចំណេញទាប នេះបើយោងតាមថ្នាក់ដឹកនាំផ្នែកឈីបរបស់តៃវ៉ាន់។

ក្រុមហ៊ុនចិនបានបង្កើនសមត្ថភាពផលិតឈីបបុរាណយ៉ាងខ្លាំងក្នុងប៉ុន្មានឆ្នាំថ្មីៗនេះ។ យោងតាម TrendForce នៅឆ្នាំ២០២៤ ចំណែកនៃសមត្ថភាពផលិតកម្មឈីបកម្រិតចាស់សកលរបស់ចិនមាន ៣៤ ភាគរយ ខណៈដែលតៃវ៉ាន់មាន ៤៣ ភាគរយ។

ត្រឹមឆ្នាំ២០២៧ ចំណែកទីផ្សាររបស់ចិនត្រូវបានព្យាករណ៍ថានឹងលើសតៃវ៉ាន់ ខណៈដែលកូរ៉េខាងត្បូង និងសហរដ្ឋអាមេរិក ដែលមានចំណែកទីផ្សារតិចជាងមួយខ្ទង់ភាគរយ ត្រូវបានរំពឹងថានឹងធ្លាក់ចុះ។

ក្រុមហ៊ុនប្រឹក្សាយោបល់ SEMI ព្យាករណ៍ថា ក្នុងចំណោមរោងចក្រផលិតឈីបថ្មីចំនួន ៩៧ ដែលចាប់ផ្តើមផលិតពីឆ្នាំ២០២៣ ដល់ឆ្នាំ២០២៥ មាន ៥៧ ស្ថិតនៅក្នុងប្រទេសចិន។

ទោះបីជារោងចក្រផលិតឈីបតៃវ៉ាន់នៅតែអាចប្រកួតប្រជែងលើកត្តានានា ដូចជាស្ថិរភាពនៃដំណើរការ និងអត្រាទិន្នផលផលិតកម្មល្អប្រសើរជាងក៏ដោយ បុគ្គលិកជាន់ខ្ពស់ម្នាក់ដែលធ្វើការនៅក្រុមហ៊ុនរចនាឈីបតៃវ៉ាន់បាននិយាយថា រោងចក្រផលិតឈីបចិនបានកាន់តែមានសកម្មភាពច្រើនក្នុងការទាក់ទាញអាជីវកម្មចាប់តាំងពីឆ្នាំ២០២៣។

បុគ្គលនោះ និងបុគ្គលម្នាក់ទៀតដែលធ្វើការនៅក្រុមហ៊ុនរចនាឈីបតៃវ៉ាន់មួយទៀតបាននិយាយថា អតិថិជនចិន ជាពិសេសក្នុងវិស័យផ្តោតលើអ្នកប្រើប្រាស់ ដូចជាផ្ទាំងបង្ហាញ កំពុងតែស្នើសុំឱ្យក្រុមហ៊ុនរចនាឈីបតៃវ៉ាន់ជួលរោងចក្រចិនឱ្យផលិតឈីបកាន់តែច្រើនឡើង ស្របតាមការអំពាវនាវពីប៉េកាំងឱ្យក្រុមហ៊ុនចិនធ្វើមូលដ្ឋានីយកម្មខ្សែសង្វាក់ផ្គត់ផ្គង់។

បុគ្គលទាំងពីរបានស្នើសុំមិនបញ្ចេញឈ្មោះ ដោយសារភាពរសើបនៃបញ្ហានេះ។

ក្រុមហ៊ុនដែលពាក់ព័ន្ធនឹងរដ្ឋាភិបាលចិន ដូចជា China Mobile និង China Telecom ក៏បានដាក់ចេញនូវលក្ខខណ្ឌតឹងរ៉ឹជាងមុនក្នុងការប្រើប្រាស់គ្រឿងបន្លាស់ផលិតនៅក្នុងប្រទេសចិន។

ក្រុមហ៊ុន China Mobile និង China Telecommunications Corporation ព្រមទាំងក្រសួងឧស្សាហកម្ម និងបច្ចេកវិទ្យាព័ត៌មានរបស់ចិន មិនបានឆ្លើយតបនឹងសំណើសុំការអត្ថាធិប្បាយទេ។

• ឥទ្ធិពលរបស់ Trump

លោក Galen Zeng អ្នកគ្រប់គ្រងការស្រាវជ្រាវជាន់ខ្ពស់នៅក្រុមហ៊ុនស្រាវជ្រាវទីផ្សារសកល IDC បាននិយាយថា ក្រុមហ៊ុនរចនាឈីប និងរោងចក្រផលិតឈីបតៃវ៉ាន់ទំនងជានឹងធ្វើឯកទេសកម្មដំណើរការរបស់ពួកគេ និងធ្វើពិពិធកម្មចេញពីឈីបបុរាណ ទោះបីជាប្រាក់ចំណេញរបស់ពួកគេនឹងនៅតែរងផលប៉ះពាល់ពីការប្រកួតប្រជែងរបស់ចិនក្នុងរយៈពេលមធ្យមក៏ដោយ។

លោក Huang នៃក្រុមហ៊ុន Powerchip បាននិយាយថា ពួកគេមានគម្រោងកាត់បន្ថយការងាររបស់ពួកគេលើឈីបបញ្ជាអេក្រង់ និងឈីបចាប់សញ្ញា ដែលភាគច្រើនត្រូវបានប្រើប្រាស់នៅក្នុងទីផ្សារចិន ហើយផ្លាស់ប្តូរការផ្តោតអារម្មណ៍ទៅលើការដាក់ជាស្រទាប់ 3D ដែលជាបច្ចេកទេសដែលរួមបញ្ចូលឈីបឡូជីក និងអង្គចងចាំ DRAM ដើម្បីកែលម្អដំណើរការគណនា និងកាត់បន្ថយការប្រើប្រាស់ថាមពល។

ក្រុមហ៊ុននេះនៅតែជាភាគទុនិកធំទីពីររបស់ Nexchip ដោយមានភាគហ៊ុន ១៩ ភាគរយ ប៉ុន្តែមិនដើរតួនាទីសកម្មក្នុងការគ្រប់គ្រងទេ។

“សម្រាប់ឈីបដែលនឹងត្រូវប្រើប្រាស់នៅក្នុងប្រទេសចិន យើងនឹងមិនអាចធ្វើអាជីវកម្មនេះបានទេ… យើងត្រូវតែចាកចេញ បើមិនដូច្នេះទេ គ្មានផ្លូវដែលអាចរស់រានបានទេ” លោក Huang បាននិយាយ។

ការធូរស្រាលខ្លះអាចកើតចេញពីកិច្ចខិតខំប្រឹងប្រែងរបស់វ៉ាស៊ីនតោនក្នុងការទប់ស្កាត់ការរីកចម្រើននៃឧស្សាហកម្មឈីបរបស់ចិន រួមជាមួយនឹងទំនាក់ទំនងកាន់តែតានតឹងរវាងប៉េកាំង និងប្រទេសផ្សេងទៀត ដែលបង្ខំឱ្យអតិថិជនបែងចែកខ្សែសង្វាក់ផ្គត់ផ្គង់ទៅជាបណ្តាញចិនសម្រាប់ចិន និងបណ្តាញមិនមែនចិន។

លោក Huang បានប្រាប់ Reuters ថា ពួកគេកំពុងឃើញការបញ្ជាទិញមួយចំនួនដែលគួរតែទៅចិន ត្រូវបានបញ្ជូនមកកាន់ទីតាំងរបស់ពួកគេនៅតៃវ៉ាន់វិញ ហើយរំពឹងថានិន្នាការនេះនឹងកើនឡើង។

បុគ្គលិកជាន់ខ្ពស់ម្នាក់មកពីក្រុមហ៊ុនរចនាឈីបនៅតៃវ៉ាន់ ដែលស្នើសុំមិនបញ្ចេញឈ្មោះដោយសារភាពរសើបនៃស្ថានការណ៍ បាននិយាយថា ពួកគេបានទទួលការបញ្ជាទិញកាន់តែច្រើនពីអតិថិជនអន្តរជាតិដែលស្នើសុំឱ្យផលិតឈីបនៅក្រៅប្រទេសចិនចាប់តាំងពីឆ្នាំ២០២៣។ “អតិថិជនមួយចំនួននឹងប្រាប់យើងថា មិនថាយ៉ាងណាក៏ដោយ ពួកគេមិនចង់ឱ្យយើងរចនាឈីបនៅក្នុងប្រទេសចិនទេ ពួកគេមិនចង់បាន ‘ផលិតនៅប្រទេសចិន’ ទេ” បុគ្គលិកជាន់ខ្ពស់រូបនោះបាននិយាយ៕

ប្រភព៖ Reuters/ec